Sancte Georgi Episcope Svellensis: Ora pro nobis.

Sancti Pontificis Georgii Calaritani, Svellensis Episcopi Apodixim (hoc est, demonstrationem) eius sanctitatis, quasi quoddam perlucidum speculum ante fidelium, piorumque hominum conspectum, operepraetium proponere duximus; ut cum eius gesta narramus, ad imitationem; ut ait Gregorius: Corda provocentur infirmorum. Quia Dum Sanctorum Vitam, gloriosumque exitum commemoramus, contra vitiorum proelia praeparamur, cum ante nos positos tot virorum fortium triumphos videmus.